2013/08/14

අවන්හලකි ජීවිතයම අපි නිති යන එන



උදෑසනම කන්තෝරුවේ ඇරඹු මෙහෙවර
මාකට්ටුවෙ අතන මෙතන ගැවසුණු පිරිවර
ගලා බසින සඳ ගම වෙත දවසේ කෙළවර
පසල් ගමක සිරිය ගනී මේ මහ පුරවර

විසල් මාර ගස් පියසක සැඟවුණු අවසඳ

පාමුළ පොඩි අවන්හලක දැහැනට සමවැද
කනාමැදිරි විදුලි පහන් අඳුර ද විනිවිද
සෙට් වුණු හැටි නිතර නිතර කෙතරම් සොඳුරුද

ජින්ජි බියර් මට නුඹ හට මී විත දෑතට

රැගෙන ඒය වේටර් තව කෑමට බීමට
සූකරමද්දව රසයෙන් කුල්මත් වීමට
අදත් මසිත තනියම යයි එහි හැන්දෑවට

ජෝතිගේ මිල්ටන්ගේ සිංදු මුමුණා හෙමිහිට

මහැදුරු ගම්ලත් කැඳවා පදරුත් හෙළිකොට
අරඹුණු සංවාද කෙමෙන් දිවයින පසුකොට
බුදුන් කැටුව පියනැඟුවෙමු අපි ලයිසියමට

කාලය නම් තුරඟු පිටෙහි නැඟිලා එදවස

සිහිනෙන් ගෑ සුවඳක් විය අහසක අවපස
නුඹත් ඈත රටකය අද නියාදහම ලෙස
කුමක් ද මේ ජීවිතය ම අවන්හලක් මිස

1 comment:

තරුරසී said...

කුමක් ද මේ ජීවිතය ම අවන්හලක් මිස